احنا عم نمر بفترة صعبة، اللي ممكن نحس فيها كتير مشاعر معقدة ومتناقضة. للتعامل والصمود بهاي الفترة مهم كتير نعطي الشرعية لمشاعرنا، شو ما كانت. توازننا النفسي كتير مهم ولصحتنا واستمرارية صمودنا.
طبيعي تحسي غضب طبيعي تحسي توتر طبيعي تحسي خوف طبيعي تحسي صدمة طبيعي تحسي وحدة طبيعي تحسي عجز طبيعي تحسي ذنب طبيعي تحسي فقدان طبيعي تحسي وجع طبيعي تحسي ثقل
طبيعي تفكري بكتير أسئلة وجودية، عن الحرب هلا وشو رح يصير بعدها. طبيعي كمان تحسي يأس.
مهم تعرفي انه شو ما كانت مشاعرك بهاي الفترة هي مشاعر طبيعية، وشرعيّة وهي استجابة بشرية طبيعية للظروف اللي بنمر فيها. مهم تقبليها، تعطيها محل، تحاولي تعبري عنها بالكلمات او بأي طريقة انتِ بتفضليها (رسم، تلوين، …).حاولي اعملي أي اشي بساعدك تتعاملي مع هاي المشاعر (بكى، صراخ، حكي، هدوء،دعاء، …).
كوني لطيفة مع حالك، تعاطفي معها، وحاولي لاقي التوازن اللي بناسبك بهاي الفترة. وتذكري انه كل استراتيجية بتتبعيها وبتحسي انها مناسبة الك هي شرعية. ما تحكمي ع حالك واعملي اللي بساعدك بهاي الفترة. بس بنفس الوقت كوني واعية لهاي الاستراتيجيات واسالي حالك قديش هي بتخدمك عنجد وشو تأثيرها على نفسيتك وجسمك على المدى القصير والطويل.
اذا المشاعر اللي حاسستيها ثقيلة عليكِ ومش عارفة تتعاملي معها، تذكري انك مش مضطرة تتعاملي معها لحالك. شاركي الناس القريبة منك واطلبي مساعدة. وما تترددي تتوجهي لشخص مختص اذا في حاجة وعندك الإمكانية.
